ராஞ்சி: Nov, 30 – இந்தியா மற்றும் தென்னாப்பிரிக்கா இடையிலான முதல் ஒருநாள் போட்டி, ரசிகர்களின் நாடித்துடிப்பை எகிற வைக்கும் வகையில் அமைந்தது. விராட் கோலியின் அபார சதத்தால் இந்தியா இமாலய ஸ்கோரை குவித்தாலும், தென்னாப்பிரிக்க வீரர்கள் கடைசி விக்கெட் வரை போராடி இந்திய ரசிகர்களுக்கு “மரண பயத்தை” காட்டினர். இறுதியில் 17 ரன்கள் வித்தியாசத்தில் த்ரில் வெற்றி பெற்ற இந்திய அணி, 3 போட்டிகள் கொண்ட தொடரில் 1-0 என முன்னிலை பெற்றது.

இந்தப் போட்டியில் டாஸ் வென்ற தென்னாப்பிரிக்கா பந்துவீச்சைத் தேர்வு செய்தது. ஜெய்ஸ்வால் 18 ரன்களில் ஆட்டமிழந்து ஏமாற்றினாலும், நீண்ட இடைவெளிக்குப் பிறகு இணைந்த ரோஹித் சர்மா 57 ரன்கள் மற்றும் விராட் கோலி 135 ரன்கள் சேர்த்து, ஜோடியாக 2-வது விக்கெட்டுக்கு 136 ரன்கள் குவித்து அசத்தியது.

ரோஹித் ஆட்டமிழந்த பிறகு, விராட் கோலி மைதானத்தின் நாலாபுறமும் சிக்ஸர்களைப் பறக்கவிட்டு 120 பந்துகளில் 135 ரன்கள் குவித்தார்.
கேப்டன் கே.எல்.ராகுல் தனது பங்குக்கு 56 பந்துகளில் 60 ரன்கள் விளாச, இந்திய அணி 50 ஓவர்கள் முடிவில் 8 விக்கெட் இழப்பிற்கு 349 ரன்கள் என்ற இமாலய இலக்கை நிர்ணயித்தது. தென்னாப்பிரிக்க பந்துவீச்சாளர்கள் அனைவருமே ரன்களை வாரி வழங்கினர்.

350 ரன்கள் என்ற இலக்கை துரத்திய தென்னாப்பிரிக்காவுக்கு ஆரம்பமே அதிர்ச்சி காத்திருந்தது. ஹர்ஷித் ராணா வீசிய 2-வது ஓவரில் ரிஜான் ரிக்கல்டன் மற்றும் குயின்டன் டி காக் ஆகியோர் டக்-அவுட் ஆகினர். அர்ஷ்தீப் சிங் மார்க்ரமை (7) வெளியேற்ற, 11 ரன்களுக்கு 3 விக்கெட்டுகளை இழந்து அந்த அணி திணறியது.

மிரட்டிய ஜான்சன் – பிரீட்ஸ்கே கூட்டணி
3 விக்கெட்களுக்கு பின் டோனி டி சோர்ஸி 39 ரன்கள் சேர்த்தும், டெவால்ட் பிரேவிஸ் 37 ரன்கள் சேர்த்தும் ஆகியோர் அணியை மீட்டனர். ஆனால், 5 விக்கெட்டுகள் விழுந்த பிறகு இணைந்த மார்கோ ஜான்சன் மற்றும் மேத்யூ பிரீட்ஸ்கே ஜோடி ஆட்டத்தையே மாற்றியது.

குறிப்பாக மார்கோ ஜான்சன் இந்திய பந்துவீச்சைத் துவம்சம் செய்தார். 39 பந்துகளில் 70 ரன்கள் (8 பவுண்டரி, 3 சிக்ஸர்) விளாசினார். மறுமுனையில் பிரீட்ஸ்கே 72 ரன்கள் குவித்தார். இந்த ஜோடி 97 ரன்கள் சேர்த்தபோது, இந்திய அணிக்குத் தோல்வி பயம் காட்டியது.

பதற்றம் அதிகரித்த நேரத்தில் பந்தை கையில் எடுத்த குல்தீப் யாதவ், ஒரே ஓவரில் ஜான்சன் மற்றும் பிரீட்ஸ்கே என இருவரையும் வீழ்த்தி ஆட்டத்தை இந்தியா பக்கம் திருப்பினார். அவர் மொத்தம் 10 ஓவர்களில் 68 ரன்கள் கொடுத்து 4 முக்கிய விக்கெட்டுகளைக் கைப்பற்றினார்.

விடாமல் போராடிய கார்பின் போஷ்
முக்கிய விக்கெட்டுகள் விழுந்தாலும், கடைசி நேரத்தில் எட்டாம் வரிசை வீரர் கார்பின் போஷ் தனி ஆளாகப் போராடினார். 51 பந்துகளில் 67 ரன்கள் விளாசிய அவர், கடைசி ஓவர் வரை ஆட்டத்தைக் கொண்டு சென்றார். கடைசி ஓவரில் 18 ரன்கள் எடுத்தால் வெற்றி பெறலாம் என்ற நிலையில் இருந்தது தென்னாப்பிரிக்கா.

கடைசி ஓவரில் பிரசித் கிருஷ்ணா பந்துவீச்சில் கார்பின் போஷ் ஆட்டமிழக்க, தென்னாப்பிரிக்கா 49.2 ஓவர்களில் 332 ரன்களுக்கு ஆல்-அவுட் ஆனது. குல்தீப் யாதவ் 4 விக்கெட்டுகள், ஹர்ஷித் ராணா 3 விக்கெட்டுகள், அர்ஷ்தீப் சிங் 2 விக்கெட்டுகள், பிரசித் கிருஷ்ணா 1 விக்கெட் வீழ்த்தினர். இந்திய அணி 17 ரன்கள் வித்தியாசத்தில் வெற்றி பெற்றது. டெஸ்ட் தொடர் தோல்விக்குப் பிறகு, இந்த வெற்றி இந்திய அணிக்கு மிகப்பெரிய நம்பிக்கையைக் கொடுத்துள்ளது.

கோயம்புத்தூர்:

ஆன்ட் ஸ்போர்ட்ஸ் சார்பில் நடைபெற்ற ‘பெடலிங் ஃபீட் 2025’ சைக்கிள்தான் போட்டி கடந்த செப்டம்பர் மாதம் தொடங்கி தொடர்ந்து நடைபெற்று வந்தது. இதில் ஆர்வமுள்ள பலரும் உற்சாகமாக பங்கேற்றனர்.இந்தப் போட்டியில் பங்கேற்ற போட்டியாளர்களின் சாதனைகளை பாராட்டும் வகையில், பதக்கம் மற்றும் பரிசளிப்பு விழா இன்று (9.11.2025) கோவை காந்திபுரத்தில் அமைந்துள்ள போர்ஸ் மோட்டார் ஷோரூமில் சிறப்பாக நடைபெற்றது.

விழாவிற்கு பல்வேறு சைக்கிள் ஆர்வலர்கள் பெருமளவில் கலந்து கொண்டனர். நிகழ்வில், பெடலிங் ஃபீட் 2025 போட்டியில் சிறந்து விளங்கிய பங்கேற்பாளர்களுக்கு பதக்கங்கள் மற்றும் பாராட்டு சான்றிதழ்கள் வழங்கப்பட்டன.

இந்த விழாவில் கலந்து கொண்ட சைக்கிள் ஆர்வலர்கள், உடல் நலனுக்கும் சுற்றுச்சூழல் பாதுகாப்பிற்கும் சைக்கிள் ஓட்டுதல் மிக முக்கியமானது என தெரிவித்தனர். இது நமது உடல் ஆரோக்கியத்தை வலுப்படுத்துவதோடு, மனஅமைதியையும் நிலைநிறுத்துகிறது என்றும், மேலும், இளைஞர்கள் அதிக அளவில் இத்தகைய நிகழ்வுகளில் பங்கேற்க வேண்டும் எனவும் வலியுறுத்தினர். இத்தகைய நிகழ்வுகள் உடற்பயிற்சி பழக்கத்தையும் ஆரோக்கியமான வாழ்க்கை முறையையும் ஊக்குவிக்கும் என தெரிவித்தனர்.இந்த நிகழ்வை ஏற்பாடு செய்து, போட்டியாளர்களை பாராட்டி ஊக்குவித்த ஆன்ட் ஸ்போர்ட்ஸ் குழுவினருக்கு பங்கேற்பாளர்கள் தங்கள் நன்றியையும் பாராட்டையும் தெரிவித்தனர்.

விழாவின் முடிவில், பெடலிங் ஃபீட் 2025 போட்டியில் கலந்துகொண்ட அனைவருக்கும் ஆன்ட் ஸ்போர்ட்ஸ் குழுவினர் விஜய் ஆனந்த் , கார்த்தி, ரமேஷ் , விவேகானந்த, மணிவண்ணன், பிரேம் பிரசாத்  நன்றி ஆகியோர் தெரிவித்துக்கொண்டனர் .

.

ஆஸ்திரேலியாவுக்கு எதிரான 4-வது டி20 போட்டியில் இந்திய அணி அபார வெற்றி

இந்த போட்டியில், டாஸ் வென்ற ஆஸ்திரேலிய அணி முதலில் பந்துவீச்சை தேர்வு செய்ததையடுத்து, முதலில் களமிறங்கிய அபிஷேக் சர்மா மற்றும் சுப்மன் கில் தொடக்கத்தில் இருந்தே இருவரும் ரன்களை சேர்க்க ஆரம்பித்த நிலையில், 28 ரன்கள் எடுத்திருந்தபோது, அபிஷேக் சர்மா ஆட்டமிழந்தார். அதைத் தொடர்ந்து சிவம் டூபே கில்லுடன் ஜோடி சேர்ந்தார். தூபே அதிரடியை தொடங்கிய நிலையில், 22 ரன்களுக்கு ஆட்டமிழந்ததைத் தொடர்ந்து, கேப்டன் சூர்யகுமார் களமிறங்கினார்.

இந்நிலையில், மறுமுனையில் 46 ரன்களுடன் அரை சதத்தை நோக்கி அடிவந்த சுப்மன் கில் ஆட்டமிழந்தார். இறுதியில், அதிரடி காட்டிய அக்சர் படேல் 11 பந்துகளில் 21 ரன்கள் எடுத்தார் இந்திய அணி 20 ஓவர்களில் 8 விக்கெட்டுகளை இழந்து 167 ரன்களை எடுத்தது. ஆஸ்திரேலிய அணி தரப்பில் அதிகபட்சமாக, எல்லிஸ் மற்றும் ஜாம்பா தலா 3 விக்கெட்டுகளை விழ்த்தினர்.

இதைத் தொடர்ந்து, 168 ரன்கள் வெற்றி இலக்குடன் களமிறங்கிய அஸ்திரேலிய அணியின் தொடக்க ஆட்டக்காரர்கள் மிட்செல் மார்ஷ் மற்றும் மேட் ஷார்ட் அதிரடியாக விளையாடினர் அவர்கள் இருவரும் சேர்ந்து, 4.5 ஓவர்களில் 37 ரன்களை குவித்தனர் சுந்தர், அக்சர், டூபேவின் அபாரமான பந்துவீச்சால் 18.2 ஓவர்களில் அனைத்து விக்கெட்டுகளையுமே இழந்த ஆஸ்திரேலியா, 119 ரன்களை மட்டுமே எடுத்தது.இந்த வெற்றியின் மூலம், ஆஸ்திரேலியாவிற்கு எதிரான 5 போட்டிகள் கொண்ட டி20 தொடரில், 2 க்கு 1 என்ற கணக்கில் இந்திய அணி முன்னிலை பெற்றுள்ளது.